Ein Haddewid Dinas sy’n Dda i Blant
Rydym yn ddinas a fydd yn gweithio gyda phlant a phobl ifanc, yn parchu eu hawliau ac yn parhau i geisio gwneud Caerdydd yn lle gwell i dyfu i fyny.
Ymgorffori hawliau plant
Byddwn yn gwneud hawliau plant yn rhan o’r ffordd rydym yn cynllunio, yn gwneud penderfyniadau, yn gwario arian, yn dylunio lleoedd, yn darparu gwasanaethau ac yn adolygu ein gwaith, fel eu bod yn cael eu hystyried o’r dechrau ac yn rhan o ymarfer pob dydd, nid yn ychwanegiad neu ôl-ystyriaeth.
Trin pob plentyn yn deg
Byddwn yn herio gwahaniaethu, yn deall anghenion a phrofiadau gwahanol plant a phobl ifanc ac yn gweithio i gael gwared ar y rhwystrau sy’n atal rhai plant rhag cael mynediad i’w hawliau, eu gwasanaethau, eu gofodau a’u cyfleoedd.
Grymuso plant
Byddwn yn helpu plant a phobl ifanc i ddeall eu hawliau, gwybod sut mae penderfyniadau’n cael eu gwneud, cael mynediad i’r wybodaeth a’r cymorth sydd eu hangen arnynt, a chael cyfleoedd gwirioneddol i siarad, arwain, gweithredu a gwneud gwahaniaeth.
Gwrando a gweithredu
Byddwn yn creu cyfleoedd ystyrlon a hygyrch i blant a phobl ifanc rannu eu barn cyn i benderfyniadau gael eu gwneud, gwrando mewn ffyrdd sy’n gweithio ar gyfer gwahanol oedrannau, anghenion a phrofiadau, a defnyddio’r hyn maen nhw’n ei ddweud wrthym i lunio cynlluniau, gwasanaethau, lleoedd a phenderfyniadau.
Bod yn atebol
Byddwn yn gwirio pa mor dda rydym yn parchu hawliau plant, yn rhannu ein cynnydd, yn esbonio ein penderfyniadau, ac yn onest am yr hyn sydd angen ei wella, wrth ei gwneud hi’n haws i blant a phobl ifanc ofyn cwestiynau, codi pryderon, herio penderfyniadau a chael eu clywed.
Mae’r addewidion hyn yn seiliedig ar Y Ffordd Gywir, dull hawliau plant a ddatblygwyd gan Gomisiynydd Plant Cymru. Mae’n helpu sefydliadau i feddwl am hawliau plant pan fyddant yn gwneud cynlluniau a phenderfyniadau ac yn darparu gwasanaethau.
Rydym yn gwybod y bydd gwneud Caerdydd yn well i bob plentyn yn cymryd amser. Mae’r addewidion hyn yn dangos yr hyn yr ydym yn gweithio tuag ato gyda’n gilydd. Byddwn yn adeiladu ar yr hyn sydd eisoes yn gweithio, yn parhau i wirio ein cynnydd, yn gwrando ar blant a phobl ifanc, ac yn onest am yr hyn sydd angen newid o hyd.
Meysydd blaenoriaeth 2026-2029:
Dyma restr o feysydd blaenoriaeth presennol Caerdydd sy’n Dda i Blant fydd yn gweld cyfres o waith yn cael ei gyflawni sy’n cyfrannu at ein set uchelgeisiol o ganlyniadau.
Addysg Hawliau Plant
Deilliant: Ar draws y ddinas, mae gan blant, pobl ifanc ac oedolion wybodaeth dda am hawliau plant ac mae plant yn cael eu cefnogi’n weithredol i fanteisio ar eu hawliau.
Lle – Cynllunio a Dylunio Dinesig
Deilliant: Mae cynllunio trefol yn cael ei ategu gan ymchwil gyfranogol ar brofiadau plant a phobl ifanc o’u cymunedau, gan gynnwys y ffordd y maent yn symud o gwmpas y ddinas ac yn mwynhau mannau cyhoeddus.
Cyfranogiad
Deilliant: Defnyddir safbwyntiau a phrofiadau plant a phobl ifanc yn gyson i lywio dylunio, datblygu a gwerthuso polisïau, gwasanaethau a rhaglenni.
Cyfartal ac yn Cael eu Cynnwys
Deilliant: Mae pob plentyn a pherson ifanc yn cael eu trin ag urddas a pharch ac yn rhydd rhag gwahaniaethu